مرات ( خلف علي الخلف )

وجهك عصافير الصبح

عيونك ندى هربان من ليل..
ومن اسمعك
أحس الفجر شباك.. ينطرني
مدري منو
أنطر خيوط الشمس وانسى:
عجب صليت الفجر ؟!
تليت سورة ضحكتك!
ولّا جمعت العمر
سجدة وحدة
وسجادتي وجهك
خلص الفجر
والشمس عليت بالسما
ونسيت روحي عـ الفجر
تنطر عصافيرك
وتسألني:
عجب ليش ما مر الصبح ؟!


2
مرة شفت الليل مايل
ومرة شفتو يضحك وبيّن سن الذهب
ومرة شفتو يلعب بروحو
والدنيا عتمة
ومرة خذاني لاول الصبح
شربنا سوالف.. وغنينا سوا:
وِلَكْ ياضو
ياطفل غافي بجوف الليل
تعال.. وهات الزمن وياك
شكَد نطرتك أنا والليل
وانت تتحجج
مرة تقول امي الشمس
لسا ما صحيت
ومسكرة علي الباب
ومرة تقول البرد واكَف على بابي
ومرة تقول أخاف من المشي بالليل
وكل مرة تتركنا أنا والليل
ننطر لتالي الليل
ويطفينا السُكر
وما نشوفك
مدري دلال
مدري تحس عيوني من تشوف الضو تبچي
وانت ما تحب الدمع
مدري ما تعرف الوكَت
اشلون يمضي وانت تنطر
مدري لانك عمرك ما نطرت احد
ولك ياضو
لو تدري شـكَد يـبچـي الليل
امن اغنيلك


3
مرة
والمطر يهذي إعلى وجهي
شفتك تلعب ببالي
حسيتك طفل ضايع
كَتلك: زغيرون.. روحي من عمرك
العب وياها لمن تجي امك
ضحكت
كَتلي آنة مو تايه
آنة لمسة تركها الحب
إعلى وجهك
مرات تحسبني مطر
مرات تحسبني عطر
مرات تحسبني طفل يلعب ضيع طريـكَ البيت
مرات تحسبني عمر تايه
بس من اضحك
تعرفني: ابن عينك


4


ياحلم
تاخذني لبساتين الشمس
ومرات اعطش
ويا كثر ميّكْ ياحلم
مرات اجوع
ترضعني فجر أبيض
مرات ابكي
احسك تنهر دموعي
وتقلي:
ترى دمعك يجفلني
ومرات... اصحى من نومي
و.. تضيع!
وِلَكْ يانوم: ظل جنبي
شيفيد الصحو
غير اضيع ها الحلم


5


مرة.. بين الصحو والنوم
كنت أحاول أستلف
لو من خيالي.. وجه حبي
اندكَ بابي
بين الكسل والشوكَ فتحت الباب
ولّا البرد يرجف
ويطكَ سن بسن
يكَلي:
أمي تسلم عليك وتقلك
يلتقى عدكم شوية دِفَا؟